Viveiro levanta as restricións para o consumo de auga
O concello toma a medida logo de comprobar que "os resultados analíticos das mostras tomadas tanto nos depósitos como os distintos puntos da rede de abastecemento cumpren cos parámetros establecidos"
Os veciños de Viveiro tiveron restricións de auga desde o pasado día 7
A alcaldesa de Viveiro, Mariña Gueimunde, anunciou o levantamento das restricións para o consumo da auga da traída decretadas o pasado día 7, logo da contaminación provocada por unha vertedura de xurro.
O Concello toma esta medida "unha vez restablecida a subministración desde a captación situada no río Landro e verificando que os resultados analíticos das mostras tomadas tanto nos depósitos como os distintos puntos da rede de abastecemento cumpren cos parámetros establecidos no Real Decreto 3/2023".
A vertedura de xurro produciuse o pasado día 6 nunha explotación de Muras e chegou polo río Landro ata a estación depuradora.
