Continúan as restricións do uso da auga en Viveiro
As limitacións levan activas dende que se detectou a vertedura de xurro no río Ladro o sábado pasado
As autoridades agardan por novas análises que aseguren o bo estado das augas
O Concello de Viveiro comunicou aos seus habitantes que as restricións do uso da auga polo vertido de xurro no río Ladro seguen activas no día de hoxe. Segundo o Consistorio, tomouse esta decisión agardando unha última análise que poida "garantir a seguridade dos veciños".
Esa situación leva así dende o pasado sábado, cando o Concello estableceu unha serie de restricións logo de detectar 1000 metros cúbicos de xurro nun regato. A auga da traída non se debe inxerir, nin utilizar para hixiene bucodental.
Este luns xa se retiraron os dispositivos de emerxencias e durante a noite recolléronse mostras de auga para as analíticas correspondentes.
Nuns primeiros parámetros, a auga cumpría cos requisitos e os parámetros establecidos, mais por precaución decidiron manter as restricións ata obter novas análises.
Informan tamén de que as cisternas que están en Covas e na travesía da Mariña seguirán neses puntos ata o levantamento total das restricións.
A alcaldesa, Mariña Gueimunde, agradeceu o labor dos servizos de emerxencia e pediu calma aos veciños: "A prioridade e garantir a calidade da auga e a seguridade da poboación".
