Un mozo acepta 4 anos de prisión por apuñalar outro nas festas de Redondela

Un mozo aceptou 3 anos e 9 meses de prisión por apuñalar outro home no Entroido de Verán de Redondela na madrugada do 25 de agosto de 2024.

A vista de conformidade celebrouse este martes na Sección Quinta da Audiencia Provincial de Pontevedra, con sede en Vigo, que o condenou por un delito de tentativa de homicidio.

A Fiscalía pedía para el oito anos de prisión, pero rebaixou a petición ata os 3 anos e 9 meses tras ter en conta as atenuantes de confesión do feito e a entrega da arma co que apuñalou á vítima. Tamén valorou que o agresor consignara a súa vítima 2.500 euros antes do xuízo.

O condenado, que está en prisión provisional, non poderá estar a menos de 300 metros da vítima nin comunicarse con ela por un período de 5 anos. Ademais, terá que indemnizala con 10.480,54 euros.

O apuñalamento produciuse durante as festas do Entroido do Verán de Redondela

Segundo o escrito de acusación, os feitos tiveron lugar a madrugada do 25 de agosto de 2024 cando o procesado, que se atopaba cuns amigos nas festas do Entroido de Verán redondelán, dirixiuse ao paseo da Xunqueira e abalanzouse sobre a vítima co "ánimo de acabar coa súa vida".

Así, propinoulle golpes no rostro e en distintas partes do corpo e asestoulle varias puñaladas cun coitelo de 11 centímetros de folla.

A vítima necesitou atención médica urxente para salvar a súa vida. Sufriu dúas feridas incisas na parede torácica esquerda e presentou distintas doenzas e tamén laceracións pulmonares que requiriron de tratamento médico e cirúrxico.

Precisou de 43 días para a súa curación e o ataque deixoulle catro cicatrices hiperpigmentadas.

Por esas feridas e secuelas, o agora condenado terá que indemnizar a vítima en 10.480,54 euros.