Un home mata a nai e entrégase á Garda Civil en Sevilla

Un home de mediana idade entregouse este venres no posto da Garda Civil de Brenes en Sevilla e confesou que matara a súa nai hai uns días.

Os axentes procederon á súa detención e abriron unha investigación para esclarecer os feitos.

Segundo indicaron fontes próximas á investigación, o homicidio puido producirse o mércores, aínda que será a autopsia a que determine con exactitude o momento da morte.

Tras a confesión, os axentes comprobaron a presenza do corpo sen vida dunha muller no domicilio da localidade onde residía.

Brenes, municipio de algo máis de 12.000 habitantes situado na comarca da Vega do Guadalquivir, a uns 20 quilómetros de Sevilla, permanece conmocionado.

O alcalde, Jorge Barrera, expresou a súa consternación polo “asasinato, presuntamente de forma violenta, dunha veciña” e confirmou que o presunto autor xa está detido e á espera de pasar a disposición xudicial.

O Concello decretou un día de loito oficial desde as 13:00 horas deste venres en memoria da vítima.