Prisión provisional para o presunto asasino dunha auxiliar de axuda no fogar do Porriño
A xuíza ordena o ingreso en módulo terapéutico ou institución análoga
O crime xerou protestas e unha folga do servizo de axuda no fogar en Galicia
Un ancián mata unha traballadora social que coidaba a súa muller nunha casa do Porriño
No Porriño, a xuíza decretou este venres o ingreso en prisión provisional, comunicada e sen fianza, do home investigado polo asasinato dunha auxiliar do Servizo de Axuda no Fogar (SAF) o pasado 29 de xullo.
O Tribunal Superior de Xustiza de Galicia indicou que está investigado por un delito de asasinato, “sen prexuízo do que depare a causa”.
A medida deberá executarse nun módulo terapéutico ou institución análoga, segundo acordou a xuíza.
A vítima, Teresa, foi atopada morta no domicilio en que traballaba.
O presunto responsable, marido da muller á que coidaba, foi detido e ingresado na unidade de psiquiatría do hospital Álvaro Cunqueiro de Vigo.
Aviso previo de acoso
A empresa concesionaria do SAF no Porriño, Aralia, sinalou que Teresa comunicara o mesmo día que sufrira acoso na vivenda, e que xa a véspera advertira de que a relación co home era complicada.
Nese momento anunciou que renunciaba ao servizo e que deixaría quince días de marxe para que se buscase unha substituta.
O asasinato provocou unha onda de indignación en Galicia, con folga no SAF e concentracións en 80 concellos para reclamar condicións laborais seguras para o persoal, maioritariamente mulleres.
A Federación Galega de Municipios e Provincias (Fegamp) anunciou o 5 de agosto a creación dunha mesa de traballo coa Xunta, o Goberno central, a patronal e os sindicatos para elaborar un protocolo de seguridade para este servizo.
