Arquivada a causa contra o actor Juan José Ballesta por suposta agresión sexual

A Audiencia Provincial de Madrid arquivou as actuacións seguidas contra o actor Juan José Ballesta por unha suposta agresión sexual a pedimento da Fiscalía que apreciou "dúbidas máis que razoables" sobre o relato da denunciante e ante a renuncia desta a continuar coa acusación.

Así o acorda a Audiencia nun auto en que declara concluído o procedemento e acorda o sobresemento das actuacións ao non existir acusación nin por parte do Ministerio Fiscal nin pola acusación particular.

O procedemento empezou tras a denuncia que interpuxo en agosto de 2023 unha veciña de Parla, de 47 anos, contra o actor -que se deu a coñecer no ano 2000 coa súa interpretación na película 'El Bola'- e contra outro home por senllas violacións sufridas en xullo, tras as que a muller ingresou nun centro psiquiátrico cunha crise psicótica.