Vítimas galegas nunha estafa masiva de mascotas por internet ligada a unha rede criminal de Biscaia
Os estafadores pedían pagos por vacinas, transporte ou microchip, pero nunca entregaban as mascotas
A Garda Civil detecta afectados en Lugo, Ourense e na Coruña tras falsos anuncios de adopción de animais
Liberaron un octoxenario ao que obrigaban a exercer a mendicidade e efectuar as estafas por Internet
EFE Garda Civil
A Garda Civil liberou un octoxenario ao que membros dunha rede criminal asentada en Biscaia illaran da súa contorna familiar para obrigarlle a exercer mendicidade e utilizalo en estafas a través de internet que superarían os 36.000 euros.
No marco da operación, desenvolta pola Garda Civil, foron detidas 18 persoas en Biscaia e unha en Burgos, mentres que outras tres están a ser investigadas, segundo informou o instituto armado nun comunicado.
Ata o momento identificáronse 121 vítimas de estafa e dez de usurpación de identidade en Tenerife, As Palmas, Madrid, Barcelona, Valencia, Málaga, Cádiz, Alacante, Almería, Baleares, Gipuzkoa, Lleida, Tarragona, Zaragoza, Albacete, Murcia, León, Badaxoz, Ávila, Lugo, Granada, Ourense, Córdoba, Cáceres, Castelló, A Rioxa, Álava, Burgos, Xaén, Xirona, Toledo e A Coruña.
A investigación comezou tras unha denuncia en febreiro de 2025, cando unha persoa manifestou ser estafada tras abonar 280 euros pola suposta adopción dun cachorro anunciado nun portal da internet, sen chegar a recibir o animal nin poder recuperar o diñeiro.
O grupo criminal, asentado en Biscaia, publicaba anuncios de venda ou adopción de animais e esixía ás súas vítimas desembolsos progresivos con diversos pretextos: vacinas, transporte, chip, gaiola... mediante abonos a través de bizum ou transferencias bancarias.
A organización utilizaba múltiples liñas telefónicas, contas bancarias e documentos de identidade falsos ou alleos para enganar aos compradores. Os axentes detectaron 57 contas bancarias e 23 liñas telefónicas vinculadas á organización, polo que se procedeu a bloquealas xudicialmente.
Os presuntos autores destinaban parte do diñeiro obtido das estafas, xunto cunha fracción das prestacións sociais que percibían -Renda de Garantía de Ingresos e Ingreso Mínimo Vital-, a investimentos en criptomoedas valoradas en máis de 55.000 euros.
A Garda Civil cifra en máis de 560.000 euros as prestacións sociais percibidas de maneira indebida.
Tres membros da organización, que pertencían a un clan familiar, mantiñan ademais baixo control a un octoxenario ao que illaran da súa contorna familiar obrigándoo a exercer mendicidade e ao que tamén lle abriron numerosas contas bancarias para cometer as estafas.
Impútase aos detidos os delitos de estafa continuada, branqueo de capitais, usurpación de estado civil, pertenza a grupo criminal, trata de seres humanos e malos tratos de obra sen lesión.
