Vinte detidos en Francia por mercar bonecas sexuais en plataformas chinesas de venda en liña

A comezos de novembro a Oficina de Menores de Francia iniciou unha investigación para dar con potenciais compradores de bonecas sexuais de aspecto infantil en catro plataformas de venda en liña: as chinesas Shein, AliExpress e Temu e a estadounidense Wish. Froito desas pescudas, a Fiscalía de París informa agora da detención de vinte homes de entre 20 e 70 anos por mercar esas bonecas en Shein e AliExpress.

Cinco dos arrestados teñen antecedentes por delitos sexuais relacionados con menores. En Francia está prohibido posuír ou importar este tipo de artigos e as penas poden supor ata cinco anos de cadea e multas de 75.000 euros.

A raíz de descubrirse a venda destas bonecas na plataforma Shein, en Francia xerouse unha gran polémica e o Goberno puxo en marcha un operativo especial nas aduanas, polo que as empresas de transporte están obrigadas a abrir e revisar os paquetes procedentes da China e informar a policía se atopan produtos deste tipo.

Ademais, o Goberno galo solicitou nos tribunais a suspensión temporal de Shein en territorio francés ou polo menos, a limitación de certos produtos de orixe asiática.

A empresa chinesa considera a medida "desproporcionada e ilegal", pero para evitar o risco de peche en Francia, amais de retirar as bonecas, decidiu suspender temporalmente a oferta de vendedores externos e de calquera produto que non sexa roupa.

A sentenza xudicial sobre a posible sanción ou suspensión comercial agárdase para o próximo 19 de decembro. Entrementres seguen as pescudas sobre esta e outras plataformas e os posibles compradores. A policía non descarta que poida haber máis arrestos nos próximos días.