Imputan 10 homes por violar en Francia un neno de 5 anos con submisión química
A Fiscalía de Lille apunta que foi o pai do rapaz quen o entregou aos dez adultos de entre 29 e 50 anos acusados de violencias sexuais agravadas polo uso de substancias químicas
Os sucesos ocorreron entre novembro de 2024 e febreiro de 2025 e os acusados enfróntanse a cadea perpetua
Imaxe dun vehículo da Policía francesa (Gerard Bottino/ EuropaPress)
Dez homes de entre 29 e 50 anos foron imputados no norte de Francia sospeitosos de violar un neno de 5 anos baixo submisión química e co acordo do seu pai, informou este martes a Fiscalía de Lille.
Nun comunicado a Fiscalía precisou que o proxenitor entregaría o seu propio fillo aos dez adultos procesados por "violencias sexuais agravadas polo uso de substancias químicas".
Os feitos investigados abarcan un período comprendido entre novembro de 2024 e o 14 de febreiro de 2025.
Os cargos inclúen ademais "violación e agresión sexual con tortura ou acto de barbarie, e "administración, sen o coñecemento nin o consentimento dun menor de 15 anos, dunha substancia que poida afectar o seu xuízo ou o control das súas accións co fin de cometer unha violación ou agresión sexual ".
A pena máxima polo delito de violación con tortura ou actos de barbarie é cadea perpetua, segundo a Fiscalía de Lille, que sinalou na súa nota que o neno recibe atención especializada e está ao cargo da súa nai, de quen o pai estaba separado xa antes dos abusos aos que someteu o seu fillo.
Un dos principais acusados neste caso suicidouse en xuño pasado, cando se atopaba en prisión preventiva.
