Vigo implanta medidas para aforrar auga e pide aos cidadáns un uso responsable

O Concello de Vigo, o máis poboado de Galicia, intensifica as restricións de auga e pide máxima responsabilidade aos cidadáns. 

A partir de hoxe queda prohibido encher as piscinas no municipio de Vigo e rebáixase o tempo e a presión das duchas nas praias. Tamén se reduce o rego e ademais o Concello enviará cartas ás grandes empresas con recomendacións para o aforro de auga.

A situación en Vigo complícase. A escasa chuvia dos últimos días non serviu para recuperar o nivel dos encoros e ante a previsión dun outono seco pídenlles aos cidadáns unha autolimitación nas casas e máis responsabilidade que nunca co consumo de auga.