Aprehendidos máis de 83.000 xoguetes irregulares en diversas festas patronais
As inspeccións realizáronse en postos ambulantes instalados en Sada, Arteixo, Culleredo e Carral
O valor total da mercancía aprehendida ascende a 123.639 euros
Entre o xénero requisado figuran 2.874 unidades dos modelos SQUISHY e DUMPLING, que presentan posibles riscos químicos e aparencia similar a alimentos
Imaxe cedida pola Garda Civil
A Garda Civil levou a cabo un operativo preventivo que permitiu aprehender un total de 83.836 xoguetes que carecían da correspondente documentación de importación legal e presentaban graves deficiencias de seguridade.
As actuacións comezaron coas inspeccións realizadas por unidades do Servizo Fiscal en distintos postos de venda ambulante instalados durante as festas patronais dos municipios de Sada, Arteixo, Culleredo e Carral, entre os meses de xullo, agosto e setembro.
Durante esta primeira fase, os axentes inmobilizaron 2.872 xoguetes preparados para a súa distribución directa ao público, procedentes de países alleos á Unión Europea.
Os responsables dos postos non puideron presentar documentación que xustificase que foran importados licitamente e detectáranse así mesmo anomalías contempladas no Real Decreto 1205/2011, do 11 de xuño, sobre a seguridade dos xoguetes, tales como a falta de advertencias obrigatorias e a ausencia da marca do CE visible, lexible e indeleble.
A partir desta primeira intervención, a Garda Civil iniciou as xestións necesarias para determinar a procedencia do xénero e localizar o distribuidor almacenista. As investigacións permitiron situar dúas naves dedicadas á venda de produtos por xunto, en cuxo interior se acharon numerosos artigos de idénticas características.
Nestas instalacións comerciais incautáronse de produtos adicionais que elevaron o cómputo total da mercancía requisada a 83.836 unidades, cuxo valor comercial estimado ascende a 123.639 euros. Entre os produtos confiscados destacan 2.874 unidades dos modelos comerciais denominados SQUISHY e DUMPLING.
Estes artigos revisten especial transcendencia na actuación policial, tendo en conta que determinados lotes desta tipoloxía foron obxecto de alertas e retiradas do mercado no Reino Unido e a comunidade autónoma de Asturias debido a riscos potenciais asociados á súa composición química, así como por presentaren unha aparencia que imita a alimentos, o que entraña o perigo de confusión e inxesta accidental por parte de menores.
As actuacións foron postas en coñecemento da autoridade administrativa competente.
