Activo un incendio no concello da Lama que afecta 20 hectáreas

A Consellería do Medio Rural informa dun incendio forestal, activo arestora, que se rexistra non concello pontevedrés da Lama, na parroquia de Escuadro. O lume iniciouse ás 04,19 horas deste sábado e segundo as últimas estimacións provisionais afecta unha superficie de arredor de 20 hectáreas.

Para a súa extinción mobilizáronse, polo de agora, 1 técnico, 7 axentes, 12 brigadas, 9 motobombas, 2 pas, 3 helicópteros e 5 avións.

A Consellería do Medio Rural lembra que está a disposición da cidadanía o número de teléfono gratuíto 085 e a aplicación móbil ALume para avisar en caso de incendio forestal, así como outro teléfono (900 815 085) para denunciar calquera actividade delituosa incendiaria da que se teña coñecemento ou sospeita.