Prealerta pola seca no Miño: pódese atravesar camiñando nalgúns treitos ao seu paso por Lugo

A estas alturas, a seca está a deixar paisaxes cando menos inquietantes ao estarmos xa en setembro. Por exemplo, a do río Miño ao seu paso por Lugo. Apenas baixa cunha cuarta de auga. A última chuvia non serviu para aliviar esta seca pertinaz e pódese atravesar o río camiñando en diversos puntos.

Outro tanto está pasando en Portomarín pola baixa do encoro de Belesar. Aló as chuvias tampouco chegaron a nada e a escasa auga deixa entrever as ruínas da antiga aldea.

O nivel de reserva de auga deste encoro está ao 34 por cento. A seca contumaz ten en alerta 32 concellos galegos con outros 59 en prealerta, igual que esta demarcación Miño-Sil.