Veciños dunha rúa de Ferrol din que non poden durmir polo ruído das obras de ADIF
Traballan 24 horas para modificar a vía para a conexión co porto exterior
Algúns veciños aseguran que a maquinaria pesada fai tremer as vivendas
O Concello fixo medicións de ruído e un informe para que o ministerio e a construtora tomen medidas
Hai dous meses que empezaron as obras para completar a conexión ferroviaria co porto exterior de Ferrol. Desde entón os veciños da rúa do Instituto conviven acotío cos ruídos dos xeradores e a maquinaria pesada. As queixas foron a máis nas últimas semanas desde que se traballa as 24 horas. Algúns veciños aseguran que ata as casas treman.
Diante das reiteradas queixas veciñais, a Policía Local fixo medicións de ruído e o Concello remitiu un informe ao Ministerio de Transportes e á empresa construtora para que tomasen medidas.
Agora recoñecen que se rega máis e tamén que se cambiou o xerador de gasóleo por outro eléctrico menos ruidoso, pero, malia iso, hai quen non pode quitar da cabeza o tempo que aínda queda de convivencia coas obras. Segundo os veciños son aínda varios meses máis día e noite a ata dous anos para que rematen. Outros relativizan as molestias e compáranas con outras trasfegas molestas habituais nas fins de semana.
