Varios implicados nunha violenta pelexa en Sarria en que resultou ferida unha persoa na cabeza
O ferido foi atendido no lugar e trasladado despois ata o hospital de Lugo
Liorta nocturna con varios implicados en Sarria. Unha persoa tivo que ser trasladada ao hospital para que a atendesen dunha ferida na cabeza. A Garda Civil investiga os feitos.
A refrega tivo lugar na rúa Rias Baixas de Sarria, onde comparten espazo varios locais de ocio. Na liorta víronse implicadas numerosas persoas. Berros, empurróns e xente polo chan. E nun deses envites, unha persoa resultou ferida na cabeza. Os servizos sanitarios prestáronse nunha primeira asistencia ao ferido no lugar e despois foi evacuado ao Hospital Lucus Augusti de Lugo.
"É unha rúa que, de cando en vez, é conflitiva. A pelexa foi bastante forte. Durante a fin de semana é unha rúa bastante concorrida por xente nova e de vez en cando hai pelexas".
" Na rúa Rías Baixas, que antes era de viños, hai agora varios locais de ocio nocturno e son frecuentes as liortas".
" As pelexas cada vez son máis brutais. Ves a xente mirando a liorta coma se fose algo habitual".
A liorta tivo lugar sobre as cinco e vinte da mañá do domingo. Os participantes dispersáronse antes de que chegasen os axentes da Policía Local e a unha patrulla da Garda Civil, que investiga o sucedido.
