Estragan cinco coches en Cambados botándolles líquido corrosivo

É a sexta vez nos últimos meses que estragan vehículos aparcados nas rúas de Cambados. Desta volta o acto vandálico produciuse na rúa Olmos, onde a noite pasada lles botaron líquido corrosivo a catro dos cinco vehículos atacados e lles estragaron a pintura. É un vandalismo que se repite nesta rúas, xa que no mes de xaneiro picaron as rodas de varios coches.

"Todas as mañás saes a traballar, e levántaste co teu coche... Se non son as rodas, agora é a pintura... Mañá que vai ser, sabes?".

"Vaia broma, é unha avaría hoxe en día como están as cousas, pero, en fin, é o que hai", din os veciños.

Os veciños xa empezan a estar fartos. Esíxenlle ao Concello que poña cámaras de vixilancia, xa que aseguran que deixar o coche aparcado en certas rúas de Cambados comeza a ser un perigo.

"Si, ultimamente si. De feito, a min picáronme as rodas do coche e aluguei outra praza de garaxe para meter o outro coche e que non volvera pasar, pero... xa vedes".

"Falaban de poñer cámaras. Non sei se as puxeron ou non, pero algo terán que facer para evitar todo isto, porque isto é unha zona moi perigosa, aparcar aquí na rúa dos Olmos é unha zona moi perigosa", quéixanse os veciños.

A Garda Civil fíxose cargo da investigación para dar co responsable ou responsables destes actos de vandalismo.