Unións Agrarias reelixe secretario a Roberto García, que pide acabar coa "confrontación" na industria

Unións Agrarias celebrou en Santiago o seu 12 congreso nacional, no que saíu reelixido como secretario xeral Roberto García. O responsable da primeira organización agraria de Galicia apelou a "romper co pasado de confrontación coa industria", nun acto en que o presidente da Xunta, Alfonso Rueda, ofreceu diálogo ao asociacionismo agrario.

Unións Agrarias fai 40 anos reivindicando prezos xustos e servizos dignos para manter o rural vivo, e anunciando tamén un cambio de actitude.

Entre os desafíos actuais, a organización destaca como lles poden afectar ás adegas os aranceis ou a nova lei de tráfico e anima a reflexionar sobre a moratoria do eucalipto.

"Non é negociable novas plantacións en terras agrarias, nin plantar eucaliptos en Rede Natura, pero a prohibición do eucalipto sen máis non solucionou o problema do piñeiro", explicou Roberto García.

O presidente da Xunta coincidiu en que cómpre reflexionar sobre este asunto e apelou ao diálogo coas organizacións agrarias para buscar solucións á falta de remuda xeracional, o aproveitamento de terras ou poder xestionar os fondos europeos dende as administracións máis próximas aos cidadáns.

"Veño a ofrecerme persoalmente e pedir interlocución para chegar a acordos", dixo Alfonso Rueda.