Unha veciña de Cospeito, con 101 anos, é unha das condutoras con máis idade de Galicia
Vive soa nunha aldea de Cospeito e ter un coche facilítalle a vida para poder desprazarse á compra, ao médico ou visitar os seus familiares
Seguramente Nieves non teña os reflexos dunha moza de vinte, pero si a prudencia ao volante
Nieves Vázquez Peteira que, aínda que non aparente a idade, ten 101 anos. É unha das condutoras máis veteranas de Galicia, se non é a máis.
Vive soa nunha aldea de Cospeito e ter un coche facilítalle a vida para poder desprazarse á compra, ao médico ou visitar os seus familiares. Á súa idade ten que renovar o carné cada ano e, unha vez máis, acaba de superar o psicotécnico sen problemas.
Seguramente Nieves non teña os reflexos dunha moza de vinte, pero si a prudencia ao volante. Ningunha multa por exceso de velocidade.
"Vou a 50. Nestas estradas xa non se pode ir a máis de 60. Son formal, vou pola miña dereita e o que me queira pasar, que me pase.Son moi prudente. Se vexo que é perigoso vou amodo e dáme tempo a reaccionar. Nunca tiven un accidente".
Todos os anos renova o psicotécnico con nota. Boa audición e conserva unha visión envexable.
"Cando me puxo as letras a doutora xa lle dixen: si quere léoas de abaixo arriba. Quedou sorprendida".
Saca o coche para ir visitar os sobriños, e facer recados en Vilalba ou Feira do Monte. Todo nun radio duns 20 quilómetros.
"Estou no límite. Vou a Vilalba son nove, vou a Cospeito son catro. A outro lado xa non vou".
Gústalle conducir. Entre outras cousas, porque ao volante non lle doen as pernas.
"Si que me gusta. Eu sento no coche e como nesa postura estou ben, é coma se tivese vinte anos".
Xunto a ela está o seu inseparable Citroën. O seu primeiro e único coche. Nunca lle deu problemas e, ao igual que a súa propietaria, sempre pasa a ITV.
