Unha tractorada cerca a Subdelegación do Goberno en Ourense nunha nova protesta de gandeiros e agricultores

Gandeiros e agricultores continúan coas protestas en Ourense, e este mércores bloquearon a entrada á Subdelegación do Goberno e mobilizaron "máis de 150 tractores" en distintos puntos da provincia, preparados para entrar á cidade.

Así o explicou Miguel Gómez, gandeiro de Maceda e portavoz dos manifestantes, en declaracións a Europa Press, quen mantivo este mércores unha reunión co alcalde de Ourense, Gonzalo Pérez Jácome, e outra reunión "sorpresa" coa conselleira de Medio Ambiente e Cambio Climático, na súa visita á cidade para asinar un acordo co Concello.

"A conselleira deunos un mitin bastante ben dado, pero moitas cousas viñan de Bruxelas e Madrid", recalcou Miguel, e incidiu en que Subdelegación "primeiro botou o balón a Medio Ambiente e Medio Rural" e estes agora "bótano de volta".

Neste contexto, Gómez sinalou que tanto Pérez Jácome como Vázquez trasladaron o seu "apoio ao 100 %". Nesta liña, avisou de que agora se atopan á espera de poder reunirse co subdelegado do Goberno, Eladio Santos, para valorar que accións emprender a continuación.

"Jácome avisounos de que empezaron os colexios, entón hai que reestruturar un pouco os tractores, porque xa lle avisaron de que está prevaricando ao non tomar medidas", engadiu Gómez.

Nestes momentos, os manifestantes xa están a retirar un dos tractores que bloqueaba o acceso á Subdelegación, así como os barrís de palla, para poder manter así unha reunión con Eladio Santos.

As mobilizacións do sector sucédense desde o pasado 29 de decembro, cando esta serie de concentracións empezou a rodear o edificio gobernamental. 

Subdelegación pechada ao público

A Subdelegación do Goberno en Ourense, segundo informou a través dunha nota aos medios, está pechada ao público por razóns de seguridade e o seu persoal está a traballar no interior "con total normalidade". As citas previstas para este mércores están a ser reprogramadas, detalla o comunicado.

A mesma fonte afirma que a concentración só estaba autorizada para o pasado 29 de decembro e que a regulación do tráfico na cidade lle corresponde ao Concello ourensán.

Tamén lembra que o subdelegado, Eladio Santos, recibiu os manifestantes o primeiro día e que se comprometeu con eles a citalos con representantes ministeriais nos vindeiros días.

Asemade, a nota incide en que a PAC está aínda en vías de negociación e que o Goberno central reformou a Lei da cadea alimentaria para sancionar a venda de produtos por debaixo do seu custo, e que a aplicación da norma é competencia da Xunta de Galicia. 

A Xunta di que estará "á beira" de gandeiros e agricultores

Pola súa banda, a conselleira de Medio Ambiente, en declaracións a medios previas á reunión cos portavoces da tractorada, recalcou que a Xunta "estará á beira" dos manifestantes, e insistiu en que "o que hai que pedirlle a Europa" é que "o mesmo que se lle esixe" a produtores galegos "se lle esixa tamén aos demais".

"Estamos nunha posición de debilidade e iso non podemos permitilo, porque redunda de maneira moi negativa en todos", engadiu, e afeou que "entren produtos sen controis do resto do mundo" mentres "aquí se seguen facendo de maneira exhaustiva".

Xornadas de protesta

Baixo o lema "Gandeiros Unidos. Sen campo, a cidade non come" e "Basta xa. Están a matar ou rural", os manifestantes mobilizáronse durante case dúas semanas nas portas da Subdelegación co obxectivo de trasladar o descontento co acordo da UE con Mercosur e en defensa dunha Política Agrícola Común (PAC) "xusta".

"Nós non estamos en contra dos nosos consumidores, estamos aquí para darlles un alimento de calidade e tratar de seguir loitando", explicara Miguel Gómez, en resposta a medios para explicar o motivo das protestas, así como a necesidade de "revisar a táboa de regularización das indemnizacións", pero "conservando a cabana gandeira", sen recorrer a sacrificacións. "Eu non quero que me sacrifiquen os meus animais, quero que haxa un plan antes da enfermidade, non despois", engadira.

En concreto, trasladáronse á cidade durante estas xornadas de protesta gandeiros e agricultores provenientes de zonas como A Limia, Manzaneda, Viana do Bolo e Maceda, (Ourense) ou Deza (Pontevedra), así como algúns produtores da provincia de Lugo.