Unha tractorada en defensa do agro colapsa o centro de Ourense
A protesta foi convocada contra o acorda ca UE con Mercosur e para reivindicar una Política Agrícola Común (PAC) "xusta"
Unha tractorada de gandeiros colapsou o centro de Ourense este luns, na contorna da Subdelegación do Goberno, en contra do acordo da UE con Mercosur e en defensa dunha Política Agrícola Común (PAC) "xusta".
Sobre as 15:45 chegaron decenas de tractores e coches ata a Subdelegación do Goberno, despois de saír do polígono de San Cibrao das Viñas. Acudiron desde comarcas como A Limia ou O Deza.
A chegada dos tractores obrigou a cortar carrís de rúas como Xoán XXIII e Concello, con presenza policial na zona, á vez que vehículos foron aparcando nas inmediacións da Subdelegación.
Esta protesta está convocada baixo os lemas "Gandeiros Unidos. Sen campo, a cidade non come" e "Basta xa. Están a matar ou rural". Inclúe outras demandas como control do xabaril e defensa de servizos no rural.
O presidente da asociación Gandeiras e Gandeiros Galegos, Adrián Riádigos, da zona do Deza, sinalou que "a principal reivindicación é que non se asine o acordo con Mercosur". Con esta protesta búscase facer un "chamamento" polos problemas que carrexará ao supoñer un "cambio de modelo de alimentación" en detrimento do sector europeo.
O ano pasado, en datas do Entroido ourensán, xa houbo unha tractorada na mesma zona durante varios días en febreiro de 2024.
