Os PAC estrean novo horario, os sábados abren as 24 horas
Con esta novidade, o horario completo dos Puntos de Atención Continuada será de luns a venres desde as 15.00 ata as 8.00 do día seguinte e as 24 horas dos sábados, domingos e festivos
Os Puntos de Atención Continuada (PAC) de Galicia estrearán este sábado novo horario, ao ser esta a primeira fin de semana tras a publicación do decreto que modifica a atención nestes puntos no Diario Oficial de Galicia (DOG).
Pasarán a abrir o sábado as 24 horas, e non a partir das 15.00 horas como ata o de agora. O horario completo será de luns a venres desde as 15.00 horas ata as 8.00 do día seguinte e as 24 horas sábados, domingos e festivos. O anuncio desta medida suscitou críticas no seu momento entre asociacións de pacientes e sindicatos médicos, que consideraban que a modificación provocaría excesos de xornada, visto o déficit de persoal en primaria.
A pesar de todo, tras ser aprobada polo Consello da Xunta, esta semana o decreto publicouse no DOG, co que a súa aplicación se fai lei. Desde a Consellería de Sanidade insistiron en que non hai motivos para pensar que se poidan rexistrar incidencias, asegurando que a atención está "garantida".
A norma, lembraba o propio conselleiro, Antonio Gómez Caamaño, viña acompañada doutras medidas como a voluntariedade incentivada. Ademais, insistiu en que esta modificación responde á "natureza real" da atención e que xa se levaba a cabo, "de facto", en moitos puntos de Galicia.
