A Xunta esixe blindar os fondos da PAC para garantir a sustentabilidade do sector primario

A conselleira do Medio Rural, María José Gómez, reclamou este mércores que os fondos da Política Agraria Común (PAC) —e, en especial, os dedicados ao desenvolvemento rural— "sigan estando blindados" nos orzamentos da Unión Europea.

Fíxoo durante a súa participación, por videoconferencia, nas reunións da Conferencia Sectorial de Agricultura e Desenvolvemento Rural e dos consellos consultivos de política agrícola e política pesqueira, presididos polo ministro de Agricultura, Pesca e Alimentación, Luis Planas.

Nestas reunións, Gómez instou o ministro e o Goberno de España a "loitar" por un orzamento suficiente e mostrou o seu desacordo tanto coa redución do 20 % dos fondos como coa desaparición do segundo piar da PAC (desenvolvemento rural), que se incluiría nun fondo común ao que tamén poderían acceder outros departamentos (consellerías ou ministerios), dentro do Marco Financeiro Plurianual.

Ademais, a conselleira tamén lle reclamou ao ministro que solicite á UE unha moratoria na entrada en vigor do caderno dixital das explotacións, prevista para o 1 de xaneiro de 2027. Segundo Gómez, se non se adopta esta medida, as pequenas granxas e os produtores de Galicia terán que facer fronte a un sobrecusto para pagar a alguén que lles xestione este trámite, "nun momento especialmente delicado para o sector".

En relación coas dificultades do sector, a titular do Medio Rural criticou o atraso no repartimento, a nivel estatal, dos fondos comunitarios da axuda financeira de emerxencia pola crise en Oriente Próximo, un asunto que se abordou nestas reunións.

Gómez advertiu de que as comunidades autónomas só dispoñen ata febreiro do próximo ano para publicar as correspondentes ordes de axudas e facer efectivo o pagamento. Ademais, lembrou que os 1,6 millóns de euros procedentes de Europa se complementarán con outros 2 millóns de euros procedentes de fondos propios da Xunta.