Unha masaxista de Santiago atende os peregrinos nas últimas etapas da ruta
Petra Pestonit atopou neste servizo itinerante de masaxes no Camiño, polos hoteis e hostais da comarca, unha forma de vida que mantén desde hai dúas décadas
Unha muller chega á praza do Obradoiro lesionada e sen poder facer a última etapa do camiño a pé.
"Estiven buscando a ver se me poden facer unha masaxe, pero non atopei", conta.
Tras días de Camiño o corpo reséntese e en moitas ocasións unha masaxe terapéutica vaille facilitar ao peregrino completar a aventura. Hai máis de 20 anos que Petra viu nesta necesidade o seu nicho de negocio.
"Levo anos traballando cos peregrinos, facendo masaxes. Consideraba que é un servizo que podía ser moi útil. Foi unha experiencia en que empecei de forma pioneira para ver se funcionaba, vin que si e decidín facer disto a miña forma de vida". "O bo disto é que cada día é diferente e tes experiencias falando con persoas de todo o mundo, distintas culturas, relixións. De todo aprendes que todos somos diferentes, pero somos iguais", di Petra Pestonit.
Ofrece os seus servizos de forma itinerante nas últimas etapas da ruta.
"Melide, Arzúa, Pedrouzo, Santiago, moito parador, o Hotel San Francisco, son os meus principais clientes"
Di Petra que adapta a masaxes a as necesidades físicas e emocionais de cada cliente.
"Hai unha masaxe estrela que é a do peregrino centrado en pernas, aínda que me adapto ás necesidades dos meus clientes as emocións tamén nos pasan factura e todos traemos algo na mochila". "E tamén son peregrina, tamén fago o Camiño, fágoo de inverno. Neste traballo considerei que era fundamental saber desde o outro lado como eles se poden sentir ao final de cada etapa e ao chegar a Santiago", apunta.
