Unha fuga de gas iniciou o incendio de Campanar, en Valencia
Unha fuga de gas iniciou o incendio de Campanar, en Valencia
Técnicos da Policía Científica concluíron que o lume se orixinou na parte traseira dun frigorífico
Non se detectaron anomalías eléctricas, polo que sospeitan da falta de ventilación
Unha fuga do gas refrixerante da neveira do piso 86 do edificio do barrio valenciano de Campanar propiciou o inicio do incendio do pasado febreiro no que morreron dez persoas, segundo un estudo técnico de especialistas en incendios da Policía Científica.
Segundo o estudo, que avanzou o periódico Levante-EMV, trabállase coa hipótese de que "unha pequena fuga" nos condutos de canalización dese gas refrixerante, o isobutano, puido prender "ante calquera chispa" ou pola electricidade estática do aparello, xa que é moi inflamable.
Os técnicos da Policía Científica concluíron que o lume se orixinou na parte traseira do frigorífico, pero non detectaron ningunha anomalía eléctrica, polo que descartan o curtocircuíto e o mal funcionamento, e sospeitan da falta de ventilación, segundo indica o xornal.
Ata o de agora sabíase que o incendio que o pasado 22 de febreiro arrasou en minutos un edificio de 138 vivendas había empezando nun electrodoméstico da cociña dunha vivenda, segundo explicou en marzo a delegada do Goberno na Comunitat Valenciana, Pilar Bernabé.
