Unha avaría deixa sete horas sen luz os veciños de Anceis, en Cambre

A luz marchou ao mediodía e non regresou ata a noite nos lugares de Castrobó e Seoane.

"Xa o sábado non había luz nos farois da rúa, e o domingo a iso das dúas marchou. Eu preciso a luz porque son dependente e chamei ao pouco, pasei a tarde sen luz e ao final acabaron chamándome unhas horas despois cando se restableceu o servizo".

"Marchou a iso das tres e non volveu ata máis das oito, non puiden nin quentar a comida, comendo latas".

Sete horas ás escuras provocadas, segundo Naturgy, por un fallo na subestación de San Marcos.

"Dixeron que había unha incidencia na rede e que o corte ía durar catro horas, durou máis".

"A min non me deron explicación".

"Xa levamos tres semanas con cortes, pero non longos coma os de onte".

O apagamento do domingo foi a pinga que rebordou o vaso nesta parroquia de Cambre. Levan semanas queixándose de padecer cortes na subministración. A peor parte lévana os negocios.

"No salón de peiteado foise a luz o sábado seis veces, cortes pequenos que van e veñen. Tiven sorte que non se me estropearon os secadores, eu preciso a electricidade para traballar".

"No taller se nos quedan os coches no elevador e se estás co ordenador podes perder o que acabas de facer. Tamén na casa eu teño todo eléctrico, e quedas sen poder cociñar e a lavadora a medias".

"E logo se se estraga algún aparato ou marcha a xente do negocio, como o da hamburguesería que tivo que pechar onte, iso quen cho compensa?".

Temen que ninguén se faga cargo das perdas chegado o caso, e piden unha solución urxente para non ter que vivir e traballar pendentes da corrente.