O Canadá descarta terrorismo na explosión na base militar que deixou varios mortos
Global News informou, citando múltiples fontes militares, de que polo menos sete persoas morreron e decenas resultaron feridas
As Forzas Armadas non confirmaron oficialmente eses datos e sinalaron que non divulgarán o número de vítimas ata completar a notificación aos seus familiares
O Departamento de Defensa Nacional do Canadá sinalou este domingo que non hai indicios de actividade terrorista na explosión e posterior incendio rexistrados na base militar de Wainwright, en Alberta, que causaron polo menos sete mortos e decenas de feridos, segundo informacións de medios canadenses.
Un funcionario de Defensa declarou á radiotelevisión pública CBC que, polo momento, non existe ningún indicio de que o ocorrido sexa resultado de "actividade terrorista", aínda que a investigación continúa e os equipos de emerxencia seguen avaliando o alcance do desastre.
Global News informou, citando múltiples fontes militases, de que polo menos sete persoas morreron e decenas resultaron feridas. Segundo esas fontes, a explosión produciuse durante un exercicio con lume real que alcanzaría unha condución ou pozo de gas natural.
As Forzas Armadas non confirmaron oficialmente ese balance e sinalaron que non divulgarán o número de vítimas ata completar a notificación aos seus familiares. O Ministerio de Defensa confirmou unicamente que houbo mortos e feridos.
O incendio propagouse rapidamente fóra da área de adestramento, favorecido por fortes ventos, e obrigou a despregar un amplo dispositivo de emerxencia. Varios hospitais de Alberta activaron o protocolo para incidentes con múltiples vítimas.
O ministro de Defensa, David McGuinty, viaxa este domingo a Edmonton para recibir información sobre a situación.
A base de Wainwright, situada uns 200 quilómetros ao sueste de Edmonton, é unha das principais instalacións de adestramento militar das forzas armadas canadenses.
.jpg)
