Publicador de contidos

Publicador de contidos

Un xulgado de Pontevedra declara a Ganomagoga en concurso voluntario de acredores

Un xulgado de Pontevedra declara a Ganomagoga en concurso voluntario de acredores

No auto, contra o que cabe presentar recurso, a maxistrada tamén declara a apertura da fase de liquidación e acorda a disolución das mercantís e o cesamento dos administradores

G24.gal 29/03/2023 17:53 Última actualización 29/03/2023 19:22

O Xulgado do Mercantil número 2 de Pontevedra declarou conxuntamente en concurso voluntario de acredores as entidades Talleres Ganomagoga, Aplicaciones Metálicas de Galicia, Ganomagoga Logistics e Cedval Marine Solutions, do Grupo Ganomagoga.

Esta declaración supón “a tramitación coordinada dos mesmos, sen consolidación de masas, conservando a numeración independente, a modo de pezas separadas”, segundo consta no auto.

Polo tanto, as facultades de administración e disposición da concursada sobre o seu patrimonio quedan suspendidas, sendo asumidas pola administración concursal, que deberá presentar un informe por cada sociedade, determinando a masa activa e pasiva de cada unha delas.

No auto, contra o que cabe presentar recurso, a maxistrada tamén declarou a apertura da fase de liquidación e acordou a disolución das mercantís e o cesamento dos administradores.

Entre tanto, os traballadores continúan recabando apoios institucionais e este mércores reuníronse coa alcaldesa de Mos, Nidia Arévalo, quen se comprometeu a intermediar ante as administracións supramunicipais en busca dunha posible solución para os 200 traballadores afectados polo ERE de extinción presentado pola empresa o pasado 9 de marzo.

Desde entón, os traballadores multiplicaron as súas mobilizacións que comezaron unha semana antes porque estaban recibindo as súas nóminas con atraso.

O pasado luns, os traballadores de Talleres Ganomagoga quedaron fóra ao tratar de acceder aos seus postos e comprobar que a dirección cambiara durante a fin de semana a pechadura, o que segundo a CIG é “un peche patronal en toda regra” que os levou a presentar unha denuncia na Inspección de Traballo.

Publicidade
Publicidade
Publicidade
Publicidade