Un veciño de Carballo rescata unha muller no río Anllóns
O home daba un paseo pola beira do río cando divisou un corpo que xacía boca abaixo na auga
A muller, de 74 anos, foi trasladada ao centro de saúde sen danos graves que lamentar
Como cada mañá, Vincenzo foi dar un paseo co can pola beira do río Anllóns en Carballo. Pero non foi unha mañá coma outras: chegando á zona da estación de autobuses, divisou un corpo na auga.
"Vin unha señora boca abaixo, e reaccionei ao momento: tireime ao río", relata Vincenzo Filippelli, un italiano da Calabria que leva 20 anos en Carballo, casado cunha galega que coñeceu na emigración en Suíza.
Cre que a muller que rescatou puido precipitarse á auga entre a vexetación, nunha zona sen valar do paseo fluvial. Conta que estaba "desorientada", e ten por seguro que -noutras circunstancias- o desenlace podería ser fatal.
"Se hai máis auga, non habería salvación para a señora" afirma. "É que estaba afogando -di- un minuto máis, e acabouse".
Suxeitouna no río ata que chegaron os reforzos: axentes da Garda Civil e da Policía Local axudaron no rescate, e conseguiron subila. Abrigárona ben e, unha vez estabilizada, levárona a revisión ao centro médico de Carballo.
Por sorte todo quedou nun susto. "Para min, adrenalina" afirma Vincenzo, que agradeceu estar en boa forma para o rescate. "Vou ao ximnasio -aclara- así que, con 70 anos, estou ben preparado".
