Protección Civil estima que arderon máis de 300.000 hectáreas en España con 39 grandes incendios
España abandona a situación de preemerxencia para pasar á de alerta e seguimento
Rexistráronse 39 grandes lumes, faleceron 4 persoas e 48 quedaron feridas
Este domingo amenceu con 28 incendios forestais activos no territorio español, a maior parte deles na comunidade de Castela e León.
O traballo dos equipos de extinción, xunto coa melloría das condicións meteorolóxicas, permitiu controlar ou extinguir todos os lumes.
A directora xeral de Protección Civil deu por rematada a peor parte desta vaga de incendios forestais. A situación permitiulle ao comité estatal de coordenación pasar da fase de preemerxencia á de alerta e seguimento.
"Este tráxico episodio da historia do noso país, degrandes incendios forestais, simultáneos, en vinte días, nunha parte importantísima do noso país, rematou. Pero a campaña de incendios forestais segue, e por iso ninguén pode baixar a garda", sinalou Virginia Barcones, responsable estatal de Protección Civil e Emerxencias
O novo estado de alerta e seguimento permanente implica que o Goberno central seguirá coordinando e poñendo á disposición das comunidades autónomas todos os medios antiincendios.
4 mortos, 48 feridos e máis de 300.000 hectáreas arrasadas
A responsable de Protección Civil e Emerxencias dixo que nestes últimos vinte dias os incendios forestais deixaron tras de si catro persoas mortas e 48 feridas.
39 grandes lumes e máis de 300.000 hectáreas queimadas
Neste mes houbo 93 incendios forestais comunicados ao Cecod, 59 deles nos que se chegou a declarar a situación operativa dúas de preemerxencia. Deses 93 lumes, 39 foron o que se considera "grandes incendios" por arrasar máis de 500 ha. A falta do reconto final, os datos do satélite Copernicus apuntan a máis de 300.000 hectáreas queimadas.
O pasado 16 agosto foi o peor día, con 23 lumes en situación operativa 2, 12 en Castela e León, 5 en Galicia, 3 en Estremadura, 2 Asturias e 1 Cantabria. De momento, hai 57 persoas detidas e 142 persoas investigadas por estes episodios.
As brigadas de extinción do Ministerio de Transición Ecolóxica e Reto Demográfico (Miteco), repartidas por todo o territorio, estiveron ao cento por cento do dispositivo. O número máximo de medios aéreos operado foi de 53 nun só día, 57 se se conta cos medios de extinción internacionais.
A Unidade Militar de Emerxencias (UME), co apoio do resto de Forzas Armadas, participou en 47 operacións na loita contra incendios. Isto supuxo un número acumulado de 5.772 militares e 2.138 medios.
