O PP arrinca o curso político en Galicia e Rueda critica a resposta do Goberno central aos incendios

O Partido Popular comeza o curso político en Cerdedo-Cotobade. Máis de 2.000 persoas entre simpatizantes, militante e cargos dos populares arrouparon a Alberto Nuñez Feijoo e a Alfonso Rueda.  Feijóo e Rueda aseguraron que España ten un “Goberno falido” no que as comunidades autónomas tiveron que coordinarse ante os incendios, mentres que o Goberno de Pedro Sánchez está de perfil e sempre botándolle as culpas ao PP.

Alfonso Rueda comezou a intervención agradecendo o labor de todos os que loitaron contra o lume, dende veciños ata as comunidades que ofreceron medios, como Andalucía, e afeoulle ao Goberno central que esquivase a súa responsabilidade.

Que ten que pasar para que o goberno dunha nación cando ve que o goberno desta o está pasando mal considere que está concernido? Ata onde ten que chegar o grao de gravidade para que se dean conta de que é responsabilidade de todos, e que é todo menos unha oportunidade para queimar o adversario?

Asegurou que a Xunta traballará para mellorar a resposta aos incendios, unha tarefa á que convidará a oposición, á que acusou de intentar sacar rédito político e de buscar liortas e non solucións.

Nin unha soa manifestación contra a corrupción do Goberno central, nin unha soa manifestación con todo o que queren facer co financiamento dunhas comunidades en detrimento doutras; nin unha soa manifestación dicindo que se mandasen os medios dunha vez. Iso si, en canto teñen oportunidade únense para criticar o de sempre, sen achegar solucións.

Rueda reivindicou que Galicia terá os orzamentos aprobados nas próximas semanas, o que permitirá pagar as axudas para os afectados polos incendios que se poderán solicitar dende este luns.

Iso vai permitir dar axudas sen límite orzamentario, ata onde faga falta porque temos un orzamento do que tirar para axudar a xente cando a xente o precisa. Alá os demais, nós seguiremos construíndo vivendas, hospitais e mellorando os servizos públicos.