Todos os incendios en Galicia, oito en Ourense e un en Lugo, están baixo control
A meteoroloxía foi determinante para recuperar a normalidade nunha semana pasada por auga
Nos distintos concellos afectados queda por diante un amplo traballo de reparación do enorme impacto no medio natural
En Avión, onde se produciu un dos últimos incendios de entidade, viviron horas de angustia polo temor a que o lume chegara as casas
Segundo o último balance da Consellería de Medio Rural quedan sen extinguir definitivamente oito incendios forestais aínda que todos eles están xa baixo control desde este venres. O parte de Medio Rural non rexistra lumes activos de máis de 20 hectáreas.
Os incendios onde se segue traballando para a súa extinción son o de Avión-Nieva (250 ha), Oímbra e Xinzo de Limia (A Granxa e Gudín, 17.000 ha); A Mezquita-A Esculqueira (10.000 ha); Larouco-Seadur (ao redor de 30.000 ha); Chandrexa de Queixa (19.000 ha); Maceda (Santiso e Castro de Escuadro, 3.500 ha) e Montederramo-Paredes (120 ha), en Ourense, así como o da Pobra do Brollón-Abrence (900 ha), en Lugo.
Os grandes lumes que quedaron extinguidos o venres son os de Carballeda de Avia e Beade (Vilar de Condes e As Regadas, 3.296,14 ha), Carballeda de Valdeorras-Casaio (5.300 ha) e Vilardevós-Vilar de Cervos (2.418,71 ha), todos eles na provincia de Ourense.
O titular do día é que Galicia ten controlados todos os incendios e non hai novos focos. As condicións meteorolóxicas dos últimos días foron as mellores aliadas contra o lume, pero nalgunhas zonas castigadas polos incendios en Ourense a chuvia fíxose de rogar máis ca noutras áreas de Galicia.
Desde o concello ourensán de Avión aínda suspiran por algo máis de auga.
"Choveu un pouquiño, baixou a temperatura e espero que acaben todo ben", di un veciño deste lugar cun aceno de resignación.
"Choveu máis ou menos, algo. Debía chover un pouco más con ganas de que aplacara todo e humedecera todo ou bastante a terra", apostila unha muller.
Na hora do balance quedan 96.500 hectáreas arrasadas polo lume, segundo as cifras da Xunta, e por diante albíscase un longo traballo de reconstrución e de recuperación do patrimonio ecolóxico convertido en cinza.
"É demasiado, moito incendio. Isto non é normal. A min partíaseme moito o corazón porque ademais tivémolo moi preto cando empezou a arder por aló e achegouse moito á parroquia", explica unha veciña sinalando un punto nunha área de vivendas.
O temor a que o lume chegase ás casas en Avión prolongouse durante moitas horas.
"Se non chegan a controlalo tan axiña como o fixeron si podía pasar ás casas e sucedería unha desgraza. Pero, a verdade, atallárono moi rápido e houbo moita acción. Estaban o Exército, a Xunta de Galicia, estaban os da Forestal", comenta outra muller.
En Avión viviron un dos últimos incendios importantes, cunha dotación de medios xa moi rodados, pero queda un horizonte de retos en Galicia e en España en temas de prevención e recursos contra o lume.
