Confinan aos bañistas dunha praia de Valdoviño tras un incendio nunha furgoneta
As persoas non puideron abandonar o areal ata que remataron os traballos de extinción do vehículo, cuxos ocupantes saíron ilesos
As lapas só afectaron á furgoneta e a unha pequena zona de monte raso
Furgoneta calcinada na estrada de acceso á praia dos Botes. TVG
Bañistas da praia dos Botes, en Valdoviño, foron confinados na tarde deste luns no areal mentres se procedía á extinción dun incendio orixinado nunha furgoneta aparcada na estrada de acceso á zona.
O rexedor, Alberto González, asegurou que a Policía Local se desprazou ata o lugar para velar pola seguridade das persoas que acudiron á praia pero as lapas, finalmente, afectaron "só a unha zona pequena de monte raso e a unha furgoneta camperizada".
Os ocupantes do vehículo incendiado saíron correndo e resultaron ilesos
As testemuñas explicaron que o vehículo comezou a arder pouco despois de estacionar e que os seus ocupantes sairon correndo.
Sobre as oito da tarde, o GES de Mugardos e os Bombeiros de Narón puideron sufocar o incendio.
Alberto González, que acudiu ao areal, detallou que as altas temperaturas da xornada provocaron que houbese nos Botes "moita xente" ás 18:30 horas desta tarde, cando se orixinou o incendio, que quedou controlado case unha hora despois.
