A Deputación de Ourense asume a extinción do incendio no vertedoiro da Rúa

A Deputación de Ourense asumirá a extinción do incendio forestal que afecta ao vertedoiro municipal da Rúa desde hai dúas semanas a través dunha contratación de emerxencia coa empresa Tragsa-

Está previsto que empecen cos traballos o luns e acaben antes de que se inicie o curso escolar.

Así o anunciado o presidente provincial, Luis Menor, durante unha rolda de prensa na Rúa, acompañado pola alcaldesa da localidade, María González Albert, e outros alcaldes da comarca de Valdeorras.

Menor asegurou que desde a Deputación sempre estiveron "dispostos a cooperar e así o faremos, dando solución a unha emerxencia con total garantía nas obras".

Recoñeceu a incapacidade técnica e económica do Concello da Rúa para asumir os traballos dunha extinción "complexa", polas propias características do incendio e as condicións que afectan a saúde das persoas, polo que se fará "con total garantía técnica e de seguridade" por parte da empresa especializada Tragsa.

A contratación, cun orzamento aberto, é para a extinción do lume cun custo próximo aos 100.000 euros e a previsión é que os traballos finalicen "en poucos días". As máquinas irán chegando durante a fin de semana e comezarán a extinción o luns.

Pola súa banda, a alcaldesa, María González Albert, fixo referencia aos "duros momentos" que viviu como representante dos veciños ante este problema cuxa solución "non se podía aprazar" polos gases tóxicos que xeraba o incendio na comarca.

González Albert agradeceu "infinitamente" a colaboración da Deputación para afrontar a viabilidade dunhas obras "complexas", á vez que lamentou a actitude da Xunta que cre que debería dar " un paso máis" neste asunto.

O presidente da Xunta, Alfonso Rueda, manifestou onte que a "solución" para a entulleira municipal da Rúa "está en mans" do concello "agora mesmo" e lembrou que a Deputación de Ourense xa estaba en contacto co municipio para ofrecerlle a súa axuda, que finalmente este sábado concretouse.