Galicia mantén os medios de extinción despregados en Castela e León
O operativo, en garda ao ser tempada de alto risco, continúa na zona porque en Galicia non hai lumes activos
A Xunta respondeu este domingo á petición de Castela e León para manter os medios de extinción de incendios despregados nesa comunidade e enviará persoal para substituír o grupo mobilizado na provincia de León.
A Consellería do Medio Rural explicou que se tomou esta decisión despois de facer unha avaliación técnica da situación actual en Galicia, onde non hai lumes activos, aínda que o operativo está en garda ao ser tempada de alto risco.
Galicia mobilizou esta semana máis de 60 profesionais do seu servizo de prevención e defensa contra incendios para traballar nas comunidades de Castela e León e Madrid.
O pasado xoves despregou en León un grupo de 14 profesionais, unha bulldozer e unha motobomba, operativo reforzado o venres cun helicóptero, unha brigada e dous axentes.
Ademais, a pedimento do Goberno central, mobilizáronse en Ávila dous helicópteros, seis brigadas, catro axentes, un técnico, unha bulldozer e un posto de mando. Esta cooperación enmárcase na declaración de emerxencia de interese nacional nestes territorios.
