Os pacientes poderán chatear cos médicos de Atención Primaria do Sergas
O Consello da Xunta tamén aprobou unha nova convocatoria de axudas para as persoas con ELA por valor de 2,1 millóns de euros e a cobertura de 25 prazas de médicos de urxencia no Hospital de Ourense por concurso de méritos
O Consello da Xunta, reunido este martes, aprobou un investimento de 8,5 millóns de euros para reforzar a historia clínica electrónica con novas ferramentas e ofrecer aos pacientes unha atención máis coordinada, continua e segura. O obxectivo é modernizar a actual plataforma e avanzar a unha nova versión IANUS5.
O sistema incorporará utilidades de intelixencia artificial, axilizará as interconsultas entre especialistas e permitirá a comunicación directa entre os pacientes, vía chat, con cadanseu profesional de referencia sempre que os médicos teñan activada esta opción na plataforma IANUS5.
O Executivo galego tamén deu o visto e prace a unha nova convocatoria de axudas para as persoas con ELA, cun orzamento de 2,1 millóns de euros coa previsión de chegar a 200 persoas.
O presidente da Xunta, Alfonso Rueda, salientou que "Galicia foi a primeira comunidade autónoma en poñer a disposición das persoas con ELA unha achega", de 12.000 euros anuais para gastos derivados da súa doenza. Rueda insistiu na necesidade de que o Goberno central "rectifique e modifique os criterios da Lei ELA en canto ás axudas" para que as contías poidan dedicarse a máis supostos alén dos coidados.
A xuntanza do Goberno galego tamén aprobou o Decreto para convocar 25 prazas de médicos de Urxencias do Hospital de Ourense por concurso de méritos. O obxectivo é que o proceso estea resolto e as prazas de médicos cubertas no primeiro semestre de 2027.
