Núñez Feijóo afirma que "España non ten un Estado falido", senón un "Goberno falido"
O líder do PP inaugurou curso político en Cerdedo-Cotoboade sinalando que Sánchez sempre lle bota a culpa a outros, en referencia aos incendios
Feijóo incidiu en que non vai xestionar os "cascallos do sanchismo" e que o executivo central xa "cheira a rancio"
En Cerdedo-Cotobade abre Núñez Feijóo un curso político que se prevé intenso e polémico. Primeiro tema: os incendios forestais. O líder do PP deulles as grazas aos que puxeron en risco as súas vidas para apagar os lumes, comezando polos brigadistas. Logo dirixiu as críticas ao Goberno de Sánchez sinalando que os recursos do Estado non están para ser mendigados.
"Xa está ben que ante calquera desgraza o Goberno central se poña de perfil. A culpa sempre é de outros. É que non falla. A culpa do que pasa en España sempre é ou do PP ou das comunidades autónomas do PP ou dun tal Feijóo".
Nesa liña, Feijóo preguntou que pacto de Estado propón Sánchez se non pode nin aprobar os Presupostos e cargou contra o Goberno.
"España non é un Estado falido, o que ocorre é que España ten un Goberno central falido, pero non somos un Estado falido, as comunidades traballaron, coordináronse. Non hai que cambiar a arquitectura do Estado, hai que cambiar o Goberno central do Estado".
O líder do PP apostou por sacar España do que definiu como "bucle de incompetencia e indecencia".
"Non imos xestionar os cascallos do sanchismo, senón que imos acometer o cambio de raíz que necesita España. Imos sentar as bases dunha nación próspera, segura, unida e diversa".
Por último Feijóo dixo que o seu programa de Goberno pasa por reparar e preparar: "reparar España e preparala para un futuro próspero".
