Un radiador podería ser a causa do incendio de Ferrol que deixou catro feridos graves

O alcalde de Ferrol, José Manuel Rey Varela, asegurou este venres que os primeiros informes elaborados polo corpo municipal de bombeiros sobre o incendio deste xoves nunha vivenda do barrio de Recimil, que causou catro feridos graves, "apuntan a un radiador como causa" do suceso.

O rexedor explicou que o consistorio segue "con moito interese a evolución das catro persoas feridas", entre as que figura un traballador do servizo local contraincendios, que sufriu a amputación dunha das súas pernas.

Investigan as causas da grave lesión 

O alcalde de Ferrol indicou sobre o "accidente laboral en que resultou ferido o bombeiro", cuxo pé quedou atrapado entre os banzos dunha autoescada, que a Policía Científica "segue traballando en esclarecer os motivos que derivaron na grave lesión que se produciu cando estaban a manipular o camión".

Consternación polo accidente 

O alcalde de Ferrol recoñeceu a "consternación que supuxo este accidente para todos" e aludiu a unha "conversación" cos traballadores do servizo, sobre a que sostivo que as súas "peticións non están lonxe do que levamos propoñendo desde hai tempo".

"Como xa informei, garantiremos a adaptación do posto necesario do funcionario de bombeiros ferido para que o encomiable cumprimento do seu deber non menoscabe as súas retribucións nin a súa vocación de servizo público", precisou.

Os bombeiros de Ferrol volveron manifestarse na mañá deste venres diante da Casa Consistorial de Ferrol en solidariedade co seu compañeiro ferido e en demanda de melloras laborais e un aumento de persoal.