Polo menos 1.000 vivendas calcinadas tras incendiarse unha vila flotante en Malaisia
Polo momento as autoridades non informaron de vítimas mortais
Habilitáronse dous centros de evacuación para acoller ás máis de 9.000 persoas afectadas
Ao redor de 1.000 vivendas quedaron calcinadas e máis de 9.000 persoas víronse afectadas este domingo no leste de Malaisia tras incendiarse de madrugada o poboado flotante de Kampung Bahagia, sen que polo momento se reportasen vítimas mortais, segundo as autoridades.
"A zona afectada comprende unhas 1.200 vivendas, das cales aproximadamente 1.000 resultaron afectadas, o que involucra a 9.007 residentes", sinalou o xefe da Policía do distrito de Sandakan, ACP George Abd Rakman.
As lapas arrasaron unha superficie de máis de catro hectáreas, asegurou o xefe do parque de bombeiros de Sandakan, Jimmy Lagung.
Imaxes difundidas por medios e autoridades locais mostran intensas chamas devorando vivendas, así como estruturas calcinadas e reducidas a entullos.
O corpo local de bombeiros recibiu a alerta sobre o incendio sobre a 1.30 hora local, tras o cal un total de 35 efectivos, tanto de Sandakan, declarado en situación de desastre, como do distrito próximo de Kinabatangan, acudiron ao lugar.
A marea baixa dificultou os labores para asegurar unha fonte aberta de auga para a extinción, indicou Lagung, aínda que as autoridades xa dan por controlado o incendio e polo momento non informaron de vítimas mortais.
Tras constatar que a zona afectada non era segura para a súa ocupación, habilitáronse dous centros de evacuación para acoller ás vítimas.
"A prioridade actual é a seguridade das vítimas e a asistencia inmediata no lugar. O Goberno Federal está a coordinarse co Goberno do Estado de Sabah para brindar axuda básica e recolocación temporal canto antes", escribiu o primeiro ministro malasio, Anwar Ibrahim, en redes sociais.
