O delegado de Loterías di que o seu irmán non quixo o premio: "Actuou de forma honorable"

O delegado provincial de Loterías e irmán do loteiro que dixo atopar a primitiva premiada con 4,7 millóns de euros na Coruña asegurou que o seu parente "en ningún momento" quixo cobrar o boleto e que sempre lle pareceu que actuaba "dun xeito totalmente honorable" porque podería recibir o premio de forma "opaca".

Na súa declaración, Miguel Reija relatou que o seu irmán apareceu co boleto na carteira, deu "por bo" o seu relato e díxolle que llo levase de novo á súa administración para ver se aparecía o apostante, nunha xestión en que "en ningún momento" quixo cobralo: "Pareceume que estaba a actuar dun xeito totalmente honorable", sinalou, pois podería recibir o premio de forma "opaca" en calquera punto de España.

Dixo que ao recibir o boleto oficialmente -xa o tivera nas súas mans o día anterior- o que fixo foi metelo nun sobre de plástico para "protexer as pegadas" e que, a partir de aí, as súas actuacións sempre se cinguiron ás "ordes" de Loterías, tanto para evitar a caducidade do boleto como para as xestións de investigación. 

A sección segunda da Audiencia Provincial da Coruña celebrou este martes a sexta e última sesión do xuízo contra o loteiro Manuel Reija e o seu irmán Miguel, que no momento do sorteo era delegado provincial de Loterías, acusados de quedarse cun boleto da primitiva premiado con 4,7 millóns de euros en 2012, reclamado por dúas familias de dous falecidos.

A Fiscalía e as acusacións particulares mantiveron a súa petición de seis anos de cárcere para o loteiro da Coruña e para o seu irmán. A Fiscalía solicita para o loteiro seis anos de cárcere por un delito de estafa ou, alternativamente, por apropiación indebida. Para o delegado provincial de Loterías pide a mesma pena de prisión por branqueo de capitais xa que nesta xornada retirou o de encubrimento porque, dixo, "estaría prescrito".

As acusacións particulares, que representan a dúas familias que reclaman o premio, adheríronse a esta petición. A defensa de Manuel Reija solicitou a absolución e subsidiariamente a atenuante de dilacións indebidas e a do seu irmán Miguel a absolución.

Xunto á posible responsabilidade penal de ambos os acusados, no xuízo tamén se dirime quen é o lexítimo propietario, con dúas familias exercendo a acusación particular: a viúva e a filla do home ao que a Policía considera, tras unha investigación policial en 2018, o verdadeiro dono e a doutra persoa. tamén falecida como o primeiro, que chegou no seu momento para facer unha reclamación, pero descartándose que fose o dono.