Un operario sofre a amputación dunha man mentres traballaba nunha planta de compostaxe en Leiro
O home foi trasladado ao hospital no helicóptero medicalizado do 061 con base en Ourense
Un traballador tivo que ser evacuado de urxencia na tarde deste martes tras sufrir a amputación dunha man mentres traballaba nunha planta de compostaxe situada no municipio ourensán de Leiro.
Segundo informou o 112 Galicia, o suceso rexistrouse pouco antes das 17.00 horas na parroquia de Lamas, onde o operario cortou a man cunha cadea mentres realizaba as súas tarefas.
O 112 avisou o Servizo de Urxencias Sanitarias de Galicia-061, que mobilizou ata o lugar o helicóptero medicalizado con base en Ourense.
Unha vez no punto, o persoal sanitario asistiu a vítima, que foi trasladada a bordo da aeronave.
No dispositivo de emerxencias tamén participaron efectivos do GES de Avión e axentes da Garda Civil.
