Un incendio nun piso ocupado da Coruña deixa dúas persoas hospitalizadas por inhalación de fume

Dúas personas tiveron que ser hospitalizadas por inhalación de fume e obrigou a realoxar varias persoas despois de que se declarase un incendio no seu piso. Sucedeu no barrio dos Mallos da Coruña

Varios residentes tiveron que subir ata a azotea pra pedir axuda. O lume orixinouse na entrada do inmoble e obrigou a desaloxar algúns veciños.

"A moza que vivía enfronte baixou uns colchóns e dixémoslle que os tiña que sacar de alí porque podía pasar calquera cousa. Alguén os prendeu. Non hai outra", di unha veciña.

"Comezaron a berrar: 'lume'. Arriba hai un narcopiso e había moita xente drogándose e comezaron a baixar polas escaleiras e a berrar. Nós pechamos a porta, tapamos todo e saímos para a terraza", explica outro veciño.

Ata o lugar trasladáronse os Bombeiros da Coruña e axentes da Policía Nacional, que procederon a cortar a rúa durate a extinción das lapas. Segundo fontes do 092 existe a posibilidade de que fose provocado.

Os servizos de emerxencias chegaron rapidamente ao inmoble e extinguiron as lapas. Tamén axudaron a baixar á rúa varios veciños.

"Estaba co meu bebé dun ano e meu fillo de nove anos. Pasamos un momento moi feo". "Foron momentos de moita angustia. E agora máis angustia porque non temos a onde ir".

Esta familia asegura que aquí era complicado vivir e tamén que non lles é doado atopar outro fogar.

"Non atopo piso. Nunha inmobiliaria pídennos 900 euros por un ático. E noutra cóbrannos 300 euros por ensinarnos pisos", engade a veciña.

Por mor do lume, dúas persoas resultaron intoxicadas por inhalación de fume e tiveron que ser trasladadas en ambulancia ao CHUAC.