Un home queda ferido na cabeza tras pelexar con outro na zona da Igrexa Castrense da Coruña

Os fortes berros alertaron os transeúntes e comerciantes da céntrica rúa do Santo André. "Estaban discutindo, coma sempre. Un empurrou o outro, caeu e levou un golpe na cabeza. A xente achegouse a el porque non espertaba e levárono así", explica unha testemuña.

Daquela, moitos chamaron a policía. Pero cando os axentes chegaron ao lugar, o agresor xa fuxira. "A policía anda á súa procura. Pero tampouco sabemos moi ben quen foi porque aí había moitos".

Os comerciantes din estar fartos das pelexas que, segundo contan, acontecen con asiduidade. "Peléxanse case acotío"; "Ameázanse, pero con palabras fortes".

Situacións que xeran medo na contorna. "Sobre todo a xente maior, que xa non quere vir mercar".

Din que a policía si se deixa ver pola zona, pero cren que non é dabondo. "Policía si que hai, pero eles métense cos axentes".

Os ouriños, cartóns tirados e lixo nesta zona son outras das súas queixas.