Un equipo submarino analizará os restos do Villa de Pitanxo

A Comisión Permanente de Investigación de Accidentes e Incidentes Marítimos (CIAIM) iniciou os trámites para realizar unha operación de "busca, localización e inspección submarina do pecio do Villa de Pitanxo", naufragado en febreiro deste ano en augas do Canadá no Atlántico Norte, en Terra Nova. 

O Ministerio de Transportes asegura nunha nota de prensa que nas últimas semanas se realizaron consultas a varios organismos da Administración do Estado que xestionan buques de navegación oceánica para avaliar as súas capacidades técnicas e a oportunidade de dedicar medios públicos a estas operacións. Finalmente concluíuse que o máis axeitado é contar con compañías privadas especializadas que dispoñan de buques e equipos idóneos e de dotacións especificamente formadas.

Asegura o Ministerio que se está preparando a licitación dun contrato para ese fin e que as operacións se realizarán no ano 2023, "tendo en conta a meteoroloxía da zona e a dispoñibilidade dos medios que interveñan".

Esas operacións vanse facer en varias fases. En primeiro lugar vaise explorar o fondo mariño, no punto de afundimento e a área próxima onde sexa máis probable atopar o pecio.

Afirma a administración do Estado que a pesar de que a busca podería non dar froitos, pois dependendo da rapidez do afundimento e as correntes os restos do barco puideron pousarse a unha distancia considerable, a CIAIM cre que "é probable atopalos preto do lugar do accidente".

Logo da localización vaise proceder a unha inspección visual, cun vehículo operado de forma remota, con cámaras para examinar distintos aspectos do buque, os seus equipos, artes de pesca e do fondo mariño, que poidan resultar de interese para a investigación.

Satisfacción dos familiares

Os familiares dos mariñeiros falecidos no naufraxio recibiron este venres a confirmación por parte da CIAIM coa esperanza de que se faga realidade. "Oxalá pronto o poidamos materializar", desexou a portavoz das familias, María José de Pazo, poñendo de relevo a importancia desta noticia.

As familias levan meses solicitando ao Goberno que baixe ao pecio para tratar de obter probas sobre o sucedido na madrugada do pasado 15 de febreiro, cando o buque naufragou a 450 quilómetros das costas de Terra Nova, acabando coa vida de 21 dos 24 mariñeiros a bordo.

A partir de aí comezou unha investigación sobre o sucedido, con versións contraditorias entre os relatos dos sobreviventes. Por iso, as familias solicitaron "coñecer a verdade", sobre todo despois de que a Audiencia Nacional investigara o capitán, Juan Padín, pola presunta comisión de 21 delitos de homicidio por imprudencia. 

Outros avances na investigación

Ao mesmo tempo, o Ministerio de Transporte informa de que se están ultimando os preparativos para a realización dos primeiros ensaios co modelo de buque de laboratorio de dinámica mariña, e que concluirán antes de finalizar este ano.

Prevese que a CIAIM publique un informe preliminar sobre o accidente en febreiro de 2023, cos datos obxectivos do sinistro, pero sen incluír conclusións nin recomendacións de seguridade.