As familias do Villa de Pitanxo insisten sete meses despois do naufraxio en que se baixe ao barco
As familias do Villa de Pitanxo insisten sete meses despois do naufraxio en que se baixe ao barco
Un informe da Comisión de Investigación de Accidentes Marítimos amósase favorable a inspeccionar os restos do barco
Xa pasaron sete meses desde o afundimento en augas de Terranova do pesqueiro galego Villa de Pitanxo. As familias dos 21 mariñeiros falecidos no accidente seguen a loitar sen descanso para que se avance na investigación do que pasou no naufraxio e para que se baixe ao barco.
Malia a negativa do Goberno a esta iniciativa, agora podería prosperar tras un informe da Comisión de Investigación de Accidentes Marítimos que se amosa favorable a organizar unha expedición a 250 millas de Terranova para inspeccionar o barco
"As familias dos mariñeiros falecidos e desaparecidos estariamos satisfeitas de que se materializase a posibilidade de que se poidan inspeccionar os restos do Villa de Pitanxo" dicía no programa informativo Bos Días da TVG, Carolina Alcántara.
Insistía en que para os familiares en España, o Perú e Ghana o avance das investigacións aliviaría a súa situación.
"A busca e a verdade para que se faga xustiza e se poidan coñecer as causas do naufraxio do 15 de febreiro en Terranova é o noso obxectivo", insistía Carolina Alcántara.
As familias dos náufragos no accidente amósanse esperanzados en que o Goberno español mude a súa actitude para acelerar as investigacións.
"Cremos que si se pode facer o que esiximos. Todo o que pedimos está avaliado por expertos, polo que o executivo debería dar luz verde a baixar ao barco".
Sobre a posible construción dunha réplica do barco, que anunciou Transportes para recrear as condicións en que se produciu o afundimento, aseguran que souberon da iniciativa polo BOE sen que ningún representante do Goberno se puxese en contacto con eles.
"Aínda así todo o que sexa avanzar na investigación é favorable. Pero primeiro hai que baixar ao barco e logo investigar coa maqueta", abundan as familias.
As familias dos mariñeiros falecidos e desaparecidos no naufraxio do Villa de Pitanxo din que chegarán a onde teñan que chegar para que se faga xustiza.
"Busca, verdade e xustiza é o que nos move. Chegaremos, como xa o fixemos, a Bruxelas, e se temos que volver iremos outra vez e a calquera institución que poida facer que saía a luz toda a verdade sobre o afundimento", remarca Carolina Alcántara.
