O Barqueiro adiántase aos menús de Nadal coa súa Festa do Marisco

Este sábado celébrase a edición número 35 da Festa do Marisco do Barqueiro, en Mañón.

As actividades por este festexo xa comezaron o venres, aínda que a do sábado é a xornada central, que arrincou cun pasacalles musical e a lectura do pregón a cargo do barítono Borja Quiza, natural do municipio veciño de Ortigueira.

A degustación de diversas variedades de marisco, como percebes, navallas ou ameixas, levouse a cabo baixo unha gran carpa habilitada no porto do Barqueiro, próximo ao límite entre as provincias da Coruña e Lugo, cun prezo único de 20 euros por ración.

A xornada concluirá con máis animación musical e unha verbena nocturna e ten como complemento á propia festa a quinta edición do Mercado Rural da localidade, no que se ofrecen produtos de proximidade e ecolóxicos e que alberga diferentes talleres.

Durante o evento, a conselleira do Mar afirmou que esta cita "representa a esencia da nosa costa e a calidade dos alimentos que dá o noso mar", como os mexillóns ou o polbo, que tamén se puideron degustar no Barqueiro.

Merelles, pola súa banda, subliñou que Galicia é o "terceiro territorio nacional seleccionado, por detrás de País Vasco e Andalucía, polos turistas gastronómicos", polo que tamén enxalzou a calidade do produto recolleito pola agrupación de mariscadoras local e a confraría de pescadores do Barqueiro-Bares. 

Tamén estivo na festa o presidente da Deputación da Coruña, Valentín González Formoso.