Festa do Pan en Carral, onde o trigo torna en pan excelso
Carral acolle a 22 edición da festa dedicada ao pan con milleiros de visitantes
Unha vintena de panadarías continúan a tradición dun produto artesanal e de delicado sabor
O pan de Carral caracterízase pola súa lixeireza, suavidade e duración no tempo
Na comarca da Coruña o pan de Carral xoga con vantaxe. É que a súa sona vén de antano, cando o amasado manual e a cocción devagar en fornos de leña producían un molete de codia suave e miga irregular e lixeira. O resultado é un produto coidadoso co padal, froito do emprego de trigo de calidade, masa nai con longa fermentación, e coccións en forno de pedra.
Unha vintena de panadarías conserva a mestría tradicional na elaboración deste alimento, aínda que modernizando varios procesos sen alterar a esencia final: un pan esponxoso, lixeiro e que se conserva varios días.
"O traballo artesán segue sendo o mesmo que antano porque este pan non permite maquinaria xa que as masas son moi brandas e na máquina non se poden manexar", comenta o presidente da Asociación de panadeiros de Carral, Manuel Rodríguez.
A Festa do pan de Carral acada a súa vixésimo segunda edición e faino un ano máis con milleiros de asistentes. Para garantir a pervivencia da tradición panadeira, entre as actividades programadas estaban os obradoiros para os que os máis pequenos.
"Moi a favor da Festa do pan de Carral e de que integren aos nenos nas actividades, na tradición e nun oficio con tanta historia como é o dos panadeiros", comenta un dos asistentes que chegou coa súa filla dende Cambre para participar no evento.
Non faltaron tampouco as degustacións en forma de petiscos cardiosaudabeis e os postos da feira medieval, todo un argumentario panificador para desfrutar dun produto tan básico como excepcional.
