Rescatan tres persoas tras afundirse un barco en Cedeira
Os náufragos saltaron á auga, cando o seu barco xa se afundía, e foron recollidos por unha lancha que estaba nas proximidades
Tres persoas foron rescatadas este martes "en bo estado" tras afundirse a embarcación na que percorrían o tramo litoral próximo ao faro de Punta Candieira, en Cedeira, segundo informou a Axencia Galega de Emerxencias.
O departamento público comunicou que os afectados saltaron á auga desde o barco, que estaba a piques de afundirse, e sinalou que foron recollidos por unha lancha que permanecía nesa mesma zona.
Os tripulantes foron levados a porto e trasladados posteriormente a un centro de saúde para comprobar a súa situación médica por mor deste incidente, que aconteceu ao redor das once e media da mañá.
A persoa que dirixía a lancha que rescatou os tres afectados chamou o 112 Galicia para advertir dos feitos, e relatou que os "ocupantes da embarcación sinistrada ían na súa lancha camiño de terra e estaban ben, pero o pesqueiro quedara xunto a unhas rocas a piques de ir ao fondo".
O departamento autonómico de emerxencias mobilizou por este incidente a Salvamento Marítimo, Urxencias Sanitarias de Galicia-061, Policía Local de Cedeira, Garda Civil e Protección Civil.
