O informe sobre o naufraxio do ‘Villa de Pitanxo’ conclúe que o pesqueiro navegaba sobrecargado e que o capitán ordenou evacuar demasiado tarde
O informe sobre o naufraxio do ‘Villa de Pitanxo’ conclúe que o pesqueiro navegaba sobrecargado e que o capitán ordenou evacuar demasiado tarde
A Comisión de Investigación de Accidentes Marítimos detecta exceso de peso e modificacións non autorizadas nos tanques do buque
O organismo sinala que o capitán non valorou a tempo a gravidade da situación nin tomou medidas preventivas
A G24 tivo acceso ao informe que se publicará oficialmente este xoves
O Villa de Pitanxo afundiuse por sobrecarga e porque o capitán deu demasiado tarde a orde de abandonar o barco.
É a conclusión da Comisión Permanente de Investigación de Accidentes Marítimos, a CIAIM, tres anos e medio despois do naufraxio do pesqueiro galego fronte ás costas de Terra Nova.
O organismo atribúe o acontecido a unha neglixencia do capitán, Juan Padín. Súa foi a decisión de seguir pescando a pesar do mal tempo, unha decisión que se tomara outras veces, pero que esta saíu mal.
O informe di que o barco se afundiu pola inundación progresiva e incontrolada dos seus espazos interiores durante a virada do arte en pleno temporal.
Contribuíu que o barco levaba uns pesos que excedían os valores recollidos no seu libro de estabilidade. Di que as previsións meteorolóxicas eran precisas, polo que non cabía a sorpresa.
Porén, non se asegurou o peche de todas as aberturas do casco nin o bo funcionamento dos medios de achique. Por último, o CIAIM conclúe que cando o capitán ordenou a evacuación, xa era demasiado tarde: os mariñeiros non tiveron tempo de chegar aos traxes de inmersión nin ás balsas cos chalecos salvavidas.
A tardanza fixo que unha balsa resultase danada e acelerou a hipotermia da maioría dos falecidos.
Aquel día morreron 21 mariñeiros: de 12 non se recuperaron os corpos.
