Puente: "Non creo que o sucedido me reste capacidade para seguir no cargo"

O ministro de Transportes e Mobilidade Sostible, Óscar Puente, considera que o sucedido esta última semana non lle resta "ningunha capacidade" para seguir no cargo, pero di que o deixaría se a súa responsabilidade contribuíse á causa do dano ou ao seu agravamento.

Nunha conferencia de prensa na sede do seu ministerio, asegurou que non cre que estea nesa situación e aseverou non temer que o presidente do Goberno, Pedro Sánchez, poida cesalo, pero o seu posto está "sempre á súa disposición", asegurou.

"Síntome capacitado absolutamente", destacou o ministro, que recalcou que "nun asunto deste calado" considera que quen resulte afectado pola responsabilidade do accidente de Adamuz (Córdoba), que causou a morte a 45 persoas, tería que dimitir.

Pola súa banda, o presidente do xestor público da infraestrutura ferroviaria (Adif), Pedro Marco de la Peña, sinalou que se a investigación do accidente deriva dalgunha responsabilidade súa, "por acción ou por omisión", dimitirá "desde o minuto cero".

Rotura de carrís

Óscar Puente tamén asegurou que a rotura de carrís ferroviarios é "recorrente" en Europa e, de feito, a Axencia Europea do Ferrocarril (ERA) recibe cada ano ao redor de 3.000 avisos deste tipo.

Segundo dixo, esas roturas non se producen porque non haxa sistemas de seguridade e control e engadiu que ás veces "poden producirse fallos", como se viu no caso de Adamuz (Córdoba), un sinistro que, insistiu, foi "estraño por infrecuente".

"Se cadra a conclusión cando isto remate é que igual hai que facer outro tipo de controis", explicou o ministro na súa segunda comparecencia sobre o accidente do domingo, en que morreron 45 persoas.

"É un problema recorrente das redes ferroviarias. A ERA reporta 3.000 cavas de carril ao ano nos sistemas ferroviarios europeos" que remiten datos a este sistema, explicou o ministro sobre a tese preliminar que adiantou a Comisión de Investigación de Accidentes Ferroviarios (CIAF).

Na inmensa maioría das ocasións, subliñou, "estes eventos líbranse sen consecuencias", pero no caso de Adamuz "houbo moi mala fortuna", porque as consecuencias foron "tremendamente graves". 

Defecto de fábrica

Pola súa banda, o xestor da infraestrutura ferroviaria non descarta un defecto de fábrica do carril e, por iso, localizará todos os lotes do mesmo tramo de vía no que descarrilou o Iryo e realizará unha "auscultación especial" de toda esa remesa de aceiro.

O presidente de Adif, Pedro Marco de la Peña, explicou na súa intervención xunto ao ministro, que recibiu a súa "indicación" para revisaren eses lotes, porque, dixo, teñen "a rastrexabilidade dos datos".

Puente asegurou que o posible defecto de fábrica do carril é "unha das razóns que poden estar na hipótese", pero necesitan unha análise de laboratorio, polo que, mentres tanto, localizarán os carrís.

Marco de la Peña explicou que o subministrador do carril é Arcelormittal, "que é top e que fornece o 99% do carril utilizado por Adif, con estándares totais".

Empresas "de primeiro nivel"

As soldaduras dos carrís, outro dos puntos de debate tras o accidente, foron adxudicadas a unha unión temporal de empresas (UTE), con catro firmas de "primeiro nivel" do sector que teñen división ferroviaria, dixo o presidente de Adif.

Nese tramo fixéronse controis a 114 soldaduras, cun informe por cada unha delas, con inspección visual e utilización de líquidos penetrantes, proba xeométrica e avaliación por ultrasóns.

Despois, como reforzo, volveron revisar outras 36 soldaduras (o 30% do total) por unha empresa distinta, Ayesa -"outra enxeñería de primeiro nivel española"-, e aí constátase que cumpren todos os parámetros que esixe a normativa.