A Garda Civil di que o Adif levou material das vías de Adamuz sen avisar

Persoal do Administrador de Infraestruturas Ferroviarias (Adif) levou material da zona do sinistro ferroviario de Adamuz (Córdoba), de madrugada catro días despois do suceso, e practicou distintas probas "sen advertilo nin solicitalo", segundo recolle a Garda Civil nun oficio á xuíza que instrúe a investigación do accidente.

Porén, desde o Adif din que só retirou aquel material que nin a Garda Civil nin a Comisión de Investigación de Accidentes Ferroviarios (CIAF) levaron na súa inspección tras o accidente e que se conservou sempre a disposición policial e xudicial.

A Garda Civil, nese oficio, relata que na madrugada do 22 ao 23 de xaneiro, tras o sinistro, ocorrido o día 18, e que deixou 46 falecidos e máis de 120 feridos, persoal do Adif levou material das vías ata a base de mantemento situada no concello cordobés de Hornachuelos.

Posteriormente, xa o día 2 de febreiro, enviouse un correo electrónico ao Adif en que o advertían de que "non se realice ningún tipo de actuación nas soldaduras sen autorización previa", xa que precisamente as hipóteses que barallan como causa do sinistro é a rotura do carril ou o fallo da soldadura.

Pola súa parte, o Adif asegura que se non retirase e custodiase ese material, que nin a Garda Civil nin a CIAF recolleron, "rematarían en calquera vertedoiro" ao comezar as obras de reparación o día 26. Ademais, o administrador ferroviario insiste en que tras o seu traslado sempre estivo á disposición xudicial e policial.

Neste sentido, explican tamén que se trataba de material do tramo dirección Madrid, en que non circulaba o tren que sufriu o descarrilamento.

Nesa mesma liña vai un informe de Ineco, feito público este martes polo ministro de Transportes, Óscar Puente, no que se sinala que todo ese material non fora precintado polos investigadores e quedara exposto á deterioración.

"O día 22 de xaneiro, tras o rescate dos dous últimos falecidos, retirouse do lugar do accidente tanto o persoal investigador da CIAF como o da Garda Civil, despois de recoller todo o material probatorio que consideraron pertinente, e sen que se adoptase ningunha medida cautelar sobre a zona ou os materiais abandonados e sen precintar, quedando os cupóns expostos á deterioración", recolle a introdución do informe.

O ministro publicou este documento na rede social X, en resposta ás informacións previas sobre as acusacións ao Adif por parte da Garda Civil. 

"Cando te fas eco do que conta a fachobulosfera pasa isto. Vivimos na era da desinformación e da intoxicación. Aquí está (adxunto) a introdución do informe (de Ineco) de caracterización dos restos (de 23 folios) que non levou nin Garda Civil, nin CIAF, e que o Adif tivo a precaución de preservar", explica Puente.

O informe de Ineco elaborouse, di, precisamente para dar rastrexabilidade á retirada e posterior depósito dese material, "sen que fose manipulado ou alterado, e estando en todo momento a disposición xudicial", ademais de que, previamente á súa retirada, detallouse a localización en vía destas soldaduras.

Advertencia xudicial

Sexa como for, a xuíza da Sección Civil e de Instrución de Instancia de Montoro requiriulle ao Adif "que se absteña de realizar calquera operación tendente á extracción e traslado do material relacionado e de interese para a causa".

A instrutora do caso advírtelle ao administrador ferroviario de que se absteña de practicar "calquera proba sobre a material extraído, se non é previa autorización xudicial", á vez que lle pide "a restitución inmediata do material que obre no seu poder, todo iso baixo apercibimento de incorrer en responsabilidade penal que resultase procedente".

Respecto diso, no oficio da Benemérita sobre "posible irregularidade" por parte do persoal do Adif", ao que tivo acceso Europa Press, relátase que o 6 de febreiro, tomouse declaración ao responsable da Base de mantemento AVE do Adif en Hornachuelos (Córdoba).

Esta persoa relata que o 22 de xaneiro "recibiu orde verbal do xefe de Área de Adif, para que se procedese á retirada de cupóns de raíl, entre as que hai soldaduras, e o seu traslado ata a base de mantemento AVE, o que levou a cabo entre a noite e madrugada do citado día 22 e o 23 de xaneiro".

Tamén declara que "realizaron ensaios sobre os rieis, que foron de dureza, aínda que manifestou que non foron destrutivas", segundo se indica no informe da Garda Civil.

Entre os cupóns nos que se atopaban as soldaduras sobre as que se realizaron os ensaios, "poderían estar as que pretendía analizar a CIAF e sobre as que se solicitou autorización xudicial en oficio de data do 3 de febreiro".

O día 30 de xaneiro, por parte de axentes da Benemérita, en compañía de persoal da CIAF, trasladáronse á zona do accidente, "co obxecto de tomar novas medicións do bogie e eixe do bogie do vagón 8 de Iryo, ademais doutras complementarias nas soldaduras existentes no tramo, sendo informados de que os cupóns coas soldaduras trasladáronse ata a base de Adif en Hornachuelos".